बेतना सिमसारमा संरक्षण गरिएको ६० किलोको भाले चित्तल मध्यरातमा चोरी

सुन्दरहरैंचा । मोरङको बेलबारी नगरपालिका–४ स्थित बेतना सिमसार सामुदायिक वन उपभोक्ता समूहले कार्यालय परिसरभित्रै संरक्षित गरेर राखेको भाले चित्तल गएराती एक समुहले चोरेको छ । तस्करहरुको समुहले घेराबेराभित्र राखिएको भाले चित्तललाई रातको समयमा नियन्त्रणमा लिएर मारेर लगेको अनुमान गरिएको छ ।

त्यहाँ रहेका ६ वटा चित्तलहरु मध्ये उक्त भाले चित्तल शनिबार राति २ देखि ३ बजेको बिचमा संरक्षणका लागि बनाइएको घेराबेराभित्रबाटै चोरिएको वन उपभोक्ता समुहको सीसीटीभी फुटेजमा देखिएको छ । संरक्षण गरेको स्थानभित्रै तस्करको समुह प्रवेश गरी चित्तल मारेर लगेको समुहका पदाधिकारीहरुले अनुमान गरेका छन् । 

चित्तल राखिएको घेराबेराभित्र तस्करको समुह प्रवेश गरेर मारेर लगेको बेतना सिमासार सामुदायिक वन उपभोक्ता समूहका अध्यक्ष डम्बर बस्नेतले जानकारी दिए । उनले सीसीटीभीमा हेर्दा जनावरको जस्तो हातखुट्टा टेकेर जनावर हिंडेकै अभिनय गर्दै मानिस प्रवेश गरेको देखिएको उनले बताए । 

बेपत्ता बनाइएको चित्तल करीव ६० केजीको रहेको जनाइएको छ । संरक्षित चित्तल मारिएपछि थप अनुसन्धान अघि बढाइएको छ ।

सिमसारमा १२ जना कर्मचारी रहेका छन् । जसमध्ये दुई जना रात्रीकालिन सुरक्षा गार्ड समेत रहेका छन् । सिमसार क्षेत्रमा संरक्षित गरेर राखिएका पशुपंक्षी तथा जनावरहरू कतिपय मरिसकेका छन् भने कतिपय राखेकै ठाउँबाट भाग्ने र हराउने गरेको स्थानीयले गुनासो गर्दै आएका छन् ।

ती जनावरहरु संरक्षण गरिएका स्थानमा सुरक्षा गार्ड समेत भएकोले बेतना सिमसारबाट चित्तल चोरी हुनु सामान्य बिषय नभएको मोरङ जिल्लाका डिभिजन वन अधिकृत विष्णुलाल घिमिरेले बताए । उनले नियम कानुनमा वन्यजन्तु मार्न र चोरी गर्न नपाइने उल्लेख गर्दै त्यस्ता व्यक्ति वा समुहको खोजतलास गरि कारवाही गर्ने बताए ।

यसअघि सुन्दरहरैंचामा जंगली हात्तीको गोली हानेर मारिएको थियो । हात्तीको पुच्छर समेत काटेर लगेको पाइएको थियो । उक्त घटना सेलाउन नपाउँदै सिमसार परिसरबाटै चित्तल चोरिएको हो ।