पुलमुनि भेटियो मोटरसाइकलसँगै यादवको शव

राजविराज, २६ फागुन । कुनौली–राजविराज सडकखण्डमा पर्ने सप्तरीको तिलाठी कोइलाडी गाउँपालिका–१ स्थित पुलमुनि एक बेवारिसे पुरुषको शव भेटिएको छ । राजविराज नगरपालिका–१६ बस्ने राजेशकुमार यादवको शव मोटरसाइकलसहित भेटिएको प्रहरीले जनाएको छ ।

मधेस प्रदेश ३०६१ नम्बरको मोटरसाइकलसहित उनको शव भेटिएकाले दुर्घनामा परेर ज्यान गएको हुन सक्ने प्रहरी नायब उपरीक्षक ढुण्डीराज न्यौपानेले जानकारी दिए । कसरी दुर्घटना भयो भन्ने कुरा अहिलेसम्म नखुलेको जनाइएको छ । तर प्रहरीले घटनाका बारेमा प्रहरीले अनुसन्धान थालिएको जनाएको छ । 

पुलको तल शव देखेपछि स्थानीयबासीले प्रहरीलाई खबर गरेका थिए । मृतकको पहिचान भएपछि परीक्षणका लागि शव राजविरजस्थित गजेन्द्रनारायण सिंह अस्पताल पठाइएको प्रहरीले जनाएको छ ।