लायन्सले दमक अस्पतालमा सुविधायुक्‍त आइसीयु भवन बनाउन दुई करोड दिने

दमक । लायन्स क्लब अन्तर्राष्ट्रिय डिस्ट्रिक्ट ३२५ सी को विशेष अग्रसरता एवं दमकमा रहेका स्थानीय लायन्स क्लब तथा दमक नगरपालिकाको सहभागितामा झापाको दमक अस्पतालमा सुविधा सम्पन्न आइसीयु भवन निर्माण हुने भएको छ । 

लायन्स डिस्ट्रिक्ट ३२५ सी का गभर्नर विकास अधिकारीका अनुसार लायन्स क्लब फाउन्डेसनले दमकका स्थानीय लायन्स क्लब तथा दमक नगरपालिका समेतको सहभागितामा आइसीयु भवन निर्माण गर्न बजेट व्यवस्था गरिएको हो ।

फाउन्डेसनले संसारभरि नै आवश्यकताका आधारमा बिभिन्न सेवाका कार्य गर्ने क्रममा डिस्ट्रिक्ट ३२५ सी को माग बमोजिम सहयोग गर्न फाउन्डेसन तयार भएको अधिकारीले जानकारी दिए ।

दमकमा सरकारी अस्पताल भएपनि सुविधायुक्‍त आइसीयुको अभावमा बिरामीलाई विराटनगर, धरान, बिर्तामोड र भद्रपुरसम्म रिफर गर्नुपर्ने अवस्था रहेकोले त्यसको अन्त्य गर्न आइसीयु भवन निर्माण गर्न लागिएको हो । 

भवन निर्माणका लागि करिव साढे दुई करोड रुपैयाँ लाग्ने जनाइएको छ । त्यसका लागि लायन्स फाउन्डेसनले १ दशमलव ५ लाख डलर अर्थात नेपाली दुई करोड रुपैयाँ सहयोग गर्ने भएको हो । साथै लायन्सका स्थानीय क्लब र नगरपालिकाले म्याचिङ फन्डका रुपमा थप ५० लाख रुपैयाँ जुटाउने जनाइएको छ । 

त्यसका लागि आवश्यक प्रक्रिया अन्तिम चरणमा पुगेको र चाँडै नै शिलान्यास गरिने बताए । साथै आगामी बैशाखभित्रै आईसीयू भवन निर्माण गरी अस्पताललाई हस्तान्तरण गरिने पनि उनले बताए ।