एमाले उदयपुरको अध्यक्षमा पाँचजनाले दिए उम्मेदवारी

विराटनगर । नेकपा एमाले उदयपुर जिल्ला कमिटीको अध्यक्षका लागि पाँच जनाको उम्मेदवारी परेको छ । 

मंगलबार एमाले केन्द्रीय बरिष्ठ उपाध्यक्ष इश्वर पोखरेलले नवौं जिल्ला अधिवेशनको उद्घाटन गरेपछि बुधबार मनोनयन दर्तादेखि मतदानसम्मको कार्यतालिका प्रकासित भएको थियो ।

सोही अनुसार नवौं अधिवेशनबाट अध्यक्ष बन्ने दाउमा वर्तमान अध्यक्ष परमेश्वर घिमिरेदेखि पूर्व प्रदेश सभा सदस्य बिमल कार्की, जिल्ला समन्वय समिति उदयपुरका पूर्वप्रमुख खड्ग बहादुर परियार, एमाले नेताहरु गोपाल खत्री र भागवत राउतले उम्मेदवारी दर्ता गरेका हुन् । 

एमालेका केन्द्रीय तहका नेताहरुले सर्वसम्मत् बनाउन प्रयास गरेपनि चुनावी माहौल बनेपछि उनीहरु मिलाउनेतिर भन्दा छिटो चुनाव गराउनेतिर केन्द्रीत भएको जनाइएको छ । 

जिल्ला कमिटीको उपाध्यक्षका लागि वर्तमान सचिव कालुमान लामासहित दिलबहादुर तामाङ र भरतबहादुर थापाले उम्मेदवारी दिएका छन् ।

सचिवमा युवा नेताहरु महेश रोका, टेकबहादुर राउत र शम्भु पौडेलको उम्मेदवारी परेको जनाइएको छ । 

खुल्ला उपसचिवका लागि हेमबहादुर खड्का, जीवनाथ दाहाल, मन्दिप राई, धर्मबहादुर तामाङ, दुर्गानन्द चौधरी र नारद निरौलाले उम्मेदवारी दिएका छन् ।

त्यसैगरी महिला उपसचिव पदका जिसस उदयपुरकी पुर्व उप्रमुख गंगा राई, कटारी नगरपालिकाकी वर्तमान उपमेयर गीता खड्का र त्रियुगा नगरपालिकाकी वर्तमान उपमेयर महेश्वरी राईले उम्मेदवारी दिएका हुन् ।