बाटैमा बिक्री हुन्छन् बिरामी

विराटनगर : सम्बन्धित विषयको चिकित्सक खोज्न आएका बिरामीलाई विराटनगरको सडकबाटै दलालले क्लिनिक समक्ष बित्री गर्ने गरेका छन् । उपचारमा बिरामीले चिकित्सक हैन दलालले बिरामी खोज्ने गर्दा गलत उपचारमा दैनिक सयौं मानिस पीडित छन् । 

प्रदेशको नाममा सहमति र असहमतिका बीच अल्मलिएको कोशी प्रदेश सरकार र विराटनगर महानगरले यसलाई बेवास्ता गर्दा धेरैको ज्यान जोखिममा छ । बिरामी तथा तिनका आफन्त गतल उपचारमा फसेको थाहा नपाउँदा कानुनी उपचार नखोजी जोखिमलाई स्वीकार गर्न बाध्य भएको सरोकारवालाहरु बताउँछन् । गरिब तथा गाउँका बिरामी ठगी उपचारको जालोमा जकडिंदै गएका छन् । 

उदयपुरको ग्रामीण क्षेत्रबाट सम्भावित क्षययोगको परीक्षण गर्न राजधानी विराटनगर आएका धनबहादुर श्रेष्ठलाई शिवा कामत नाममा ब्यक्तिले कोशी अस्पताल बाहिरै सोधपुछ गरेर उपचारका लागि चिकित्सक सिफारिस गरे । नेपाल सरकारले निःशुल्क क्षयरोग परीक्षण र उपचारको ब्यवस्था गरे पनि श्रेष्ठ कामतमार्फत गतल उपचारमा परे ।

कामतले नजिकैको विषेशज्ञ चिकित्सक नभएको कुनै क्लिनिकमा लगेपछि उनको परीक्षण गरिएको थियो । बास्तविकता थाहा पाए पनि श्रेष्ठले घर जानको हतारोमा प्रहरीलाई जानकारी गराएनन् । बिरामी ठगी गर्ने गिरोह र ठगिएको प्रमाणसहित आए कारवाही गरिने मोरङका प्रहरी उपरीक्षक दीपक पोखरेलको भनाइ छ । दलाल खोज्न सादा पोशाकका सुरक्षाकर्मी पनि यदाकदा परिचालन गरिने गरिएको छ ।

उदयपुरकै एक महिलालाई शिवा जस्तै दलालले होमियोप्याथिक चिकित्सकका रुपमा बिरामीलाई झुटो आश्वासन दिएर उपचार गराउँदै आएका प्रफुलकुमार शर्मा (डा पीके शर्मा) को क्लिनिकमा लगेका थिए ।

बिरामी ठगिएपछि दलाल फेला नपरे पनि शर्मालाई बिरामीका आफन्तले कुटपिट गरेर बदला लिएका थिए । कराँते प्रशिक्षक सुरज श्रेष्ठललगायतले उनकी माइजुलाई गलत उपचार गरेको भन्दै शर्मालाई सुध्रने चेतावनी दिएर छाडेका थिए ।

विराटनगरका वरिष्ठ रोडियोलोजिष्ट डा आनन्द आचार्य र डा यज्ञराज पाठकले सञ्चालन गरेको आनन्द अल्ट्रासाउण्ड अगाडि बिरामी तान्न उभिने गरेका शिवा स्वास्थ्य शिक्षा मात्रै हैन कुनै औपचारिक शिक्षा नपाएका ब्यक्ति हुन् । उनी भिडियो एक्सरे गरेर आएका बिरामीको रिपोर्ट मागेर सडकमै हेर्छन् र उनले कमिशन पाउने क्लिनिकमा जान सल्लाह दिन्छन् ।

विराटनगर बखरीका शिवा कामत, धनपालथानको दादरबैरियाका महादेव राय, कर्सियाका सञ्जय पासवान, कटहरी नयाँ बजारका अमित मुखिया, सुनसरीका विशेश्वर मण्डल, भारतीय नागरिक सुरेन रायलयायतका ब्यक्ति बिहान ८ बजेसम्ममा बिरामी खोज्न कोशी अस्पताल आसपास आई सकेका हुन्छन् । उनीहरुले क्लिनिकमा एक जना बिरामी लैजादा प्रति बिरामी एक हजार रुपैंयाँ कमिशन पाउँछन् भने सिटी स्क्यान, एआरआईलगायतको ठुलो परीक्षणको पनि कमिशन पाउँछन् ।

क्लिनिकमार्फत दलालले बिरामीलाई भुक्याई रहेको बारे औषधि ब्यवसायी संघले आपत्ती जनाउँदै आए पनि यसैको खोजी र निगरानीमा कसैले समय दिन नपाएको संघले जनाएको छ ।

संघका मोरङ उपाध्यक्ष देशवन्धु ढकाल बिरामीलाई अपहरणको शैलीमा क्लिनिकमा लाने गरिएको बताउँदै यस खाले स्वाथ्यमा हुने बिकृति नियन्त्रणमा सबै लाग्नु पर्ने बताउँछन् । उनका अनुसार एक चिकित्सक खोज्न आएका बिरामी दलालमार्फत अर्कैकोमा पुग्ने गरेका छन् ।

प्रदेशकै ठुलो सरकारी अस्पताल कोशी अस्पताल भित्रैबाट दलालले बिरामी लैजाने गरेका कतिपय निजी क्लिनिक क्लिनिक भनें सरकारी इजाजतको प्रमाणपत्र नलिइ चलेका छन् । त्यस्ता क्लिनिकले बिरामीको समस्या एक भए पनि अनेक परीक्षण गराउने र जथाभाबी रिपोर्ट दिंदै औषधि सिफारिस गर्छन् । बिरामी धरानस्थित बीपी कोइराला स्वास्थ्य विज्ञान प्रतिष्ठानबाटै ठगी गरेर विराटनगरसम्म ल्याउने गरिएको छ ।

विराटनगरका मेयर नागेश कोइराला प्रतिष्ठानको आकश्मिक कक्षको प्रवेशद्वारबाटै एम्बुलेन्स चालकले रकम लिएर निजी अस्पतालमा लैजाने गरेको बताउँछन् । प्रतिष्ठानहरुका नाममा निकालिएका कतिपय एम्बुलेन्सले गरेका गलत क्रियाकलाप बारे प्रहरी प्रशासन मौन देखिएको मेयर कोइरालाको आरोप छ । दलालको प्रकोपले विराटनगरका सडकमा बिरामी बेचिएको दैनिक जानकारी आफूले पाए पनि उजुरी नभएकाले खोजी हुन नसकेको उनले स्वीकार गरे ।

‘महानगरको स्वास्थ्य महाशाखा यसबारे गम्भीर छ, कोशी अस्पताल अगाडिको एउटा प्रयोगशाला बन्द पनि गराएका छौं’ मेयर कोइरालाले भने । कोशी अस्पतालको भेन्टिलेटर नचलाएर बिरामीलाई निजी अस्पतालमा पठाएको बारे आफूले खबर पाए पनि कारवाहीका लागि संघीय सरकारका निकायको सहयोग नपाएको उनको भनाइ छ ।