अग्रवाल सभाले महानगरलाई दियो मोबाइल रिक्सा

विराटनगर । विराटनगरको सरसफाइ अभियानलाई सघाउन नेपाल अग्रवाल सभा विराटनगरले महानगरलाई दुई थान रिक्सा प्रदान गरेको छ । 

आइतबार महानगर परिसरमा आयोजित कार्यक्रममा नेपाल अग्रवाल सभाका अध्यक्ष राजकुमार अग्रवालले महानगरका मेयर नागेश कोइराला र उपमेयर शिल्पा निराला कार्कीलाई रिक्सा हस्तान्तरण गरेका हुन् । 
कार्यक्रममा अग्रवाल सभाका पूर्वअध्यक्ष अभिषेक तोदी, देवकीनन्दन अग्रवाल, लक्ष्मण नेवटियालगायतको उपस्थिति थियो ।

सो रिक्सालाई सरसफाइ मोबाइल एम्बुलेन्सका रुपमा प्रयोग गरिनेछ । अबदेखि मुख्य बजार क्षेत्रको फोहोर दिनभरि उठाइनेछ । 

यसअघि बिहान मात्रै फोहोर उठाउने गरिएको थियो । मेयर कोइरालाले विराटनगरको सरसफाइमा विराटनगरवासीले समेत अपनत्व लिन थालेको भन्दै खुसी व्यक्त गरे ।

सरसफाइ शाखाका प्रमुख पुनमकुमार दाहालका अनुसार रिक्साले फोहोरसँगै सडकमा मृत भेटिएका पशुपक्षीसमेत उठाउनेछ । बजार क्षेत्रमा सो रिक्सा सरसफाइ मोबाइल एम्बुलेन्सका रुपमा बिहानदेखि रातिसम्म परिचालन गरिनेछ ।

अग्रवाल सभाले उपलब्ध गराएको रिक्सा सोही कार्यक्रममा उत्तरी क्षेत्रको फोहोर व्यवस्थापनको साझेदार संस्था नेपाल फूलबारीका प्रमुख उमेश कटवाल र मध्यक्षेत्रको साझेदार संंस्था स्वास्थ्य तथा सरसफाइका लागि वातावरण नेपालका अध्यक्ष कृष्ण तिम्सिनालाई महानगरको वन, वातावरण तथा विपद व्यवस्थापन समितिका संयोजक वासुबहादुर बस्नेत, निमित्त प्रमुख प्रशासकीय अधिकृत रामप्रसाद ढुंगेल र सरसफाइ शाखाका प्रमुख पुनमकुमार दाहालले हस्तान्तरण गरेका थिए । 

अग्रवाल सभाका अध्यक्ष राजकुमार अग्रवालले महानगरले सरसफाइलाई प्रभावकारी बनाए हरेक वडालाई पुग्ने गरी थप मोबाइल रिक्सा उपलब्ध गराउने प्रतिबद्धता जनाए ।