कान उपचार सम्बन्धी कार्यशाला

विराटनगर । नेपाल नेत्रज्योति संघले विराटनगर आँखा अस्पतालमा कान उपचार सम्बन्धी बृहत कार्यशाला आयोजना गरेको छ । 

‘कान अनुकूलन हेरचाह अभ्यास, अन्तरदृष्टि र आगामी मार्गचित्र’ शीर्षकमा गरिएको कार्यशालाकोे कोशी प्रदेशका स्वास्थ्य मन्त्री भुपेन्द्र राईले उद्घाटन गरेका थिए ।

विराटनगर आँखा अस्पतालका मेडिकल सुपरिटेण्डेन्ट डा ललित अग्रवालले कान मानव शरिरको महत्वपूर्ण अंग रहे पनि त्यसको हेरचाह र उपचारको विषयलाई गम्भिरतापूर्वक नलिने प्रवृत्ति रहेको बताए । 

कार्यशालामा इम्प्याक्ट नेपालका अध्यक्ष प्रो.डा. राकेश श्रीवास्तवले नेपालमा कान उपचारको इतिहास समेटेर कार्यपत्र प्रस्तुत गरे । 

यस्तै डा.रविन आचार्य, डा. बिजय चौधरी, डा. श्लेष्मा रिजाल, डा. मिलन महर्जन, डा. ऋषि भट्ट, डा. विपिन कोइराला, डा. दिपेश शाक्य, डा.अनिल चौधरी, डा. अरुण केसीलगायतले प्रस्तुति राखेका थिए ।

विराटनगर आँखा अस्पतालका ब्यवस्थापन समिति अध्यक्ष पद्मनारायण चौधरीले आँखाको रोगलाई न्यूनीकरण गरेजस्तै अस्पतालले कानको उपचारलाई जनजनसम्म पु¥याउने लक्ष्य लिएको बताए । 

कार्यशालामा रानी आँखा अस्पताल, लुम्बिनी आँखा अस्पताल, नोबेल अस्पताल, विराट मेडिकल कलेज र सिरहा बहिरा संघ लगायतबाट कान रोग विशेषज्ञ चिकित्सक र प्राबिधिकको सहभागिता रहेको विराटनगर आँखा अस्पतालका प्रबन्धक कुमार पृथुले जानकारी दिए ।