काठमाडौं विश्वविद्यालय र दुहवी नगरपालिकाबीच बाल शिक्षा विकासको सम्झौता

विराटनगर । प्रारम्भिक बाल शिक्षाको विकासका लागि काठमाडौं विश्वविद्यालयको स्कुल अफ एजुकेशन र सुनसरीको दुहवी नगरपालिकाबीच सम्झौता सम्पन्न भएको छ ।

विश्वविद्यालय स्कुल अफ एजुकेशनले सीपीईसी विराटनगर इकाई एस्पायर कलेजमार्फत उक्त कार्यक्रमलाई कार्यान्वयन गर्ने जनाइएको छ । 

दुई पक्षबीच भएको सम्झौता अनुसार पहिलो चरणमा प्रारम्भिक बाल शिक्षा क्षेत्रमा आवश्यक पहिचान गरिएको पाठ्यक्रम विकास तथा शिक्षक तालिम जस्ता कार्यहरू गर्ने जनाइएको छ । 

उक्त साझेदारीले विशेष दुहबी नगरपालिका अन्तर्गतका विद्यालयहरूमा अध्ययनरत बालबालिकालाई गुणस्तर शिक्षा प्रदान गर्न समेत सहयोग गर्ने काठमाडौं विश्वविद्यालयकी सीपीईसी विराटनगर इकाईकी कार्यक्रम संयोजक प्रीतिका बस्नेतले बताइन् ।

सम्झौतामा दुहवी नगरपालिकाको तर्फबाट नगर प्रमुख वेदनारायण गच्छदार तथा प्रमुख प्रशासकीय अधिकृत हिमालय बरालले हस्ताक्षर गरेका छन् । 

काठमाडौं विश्वविद्यालयले शैक्षिक अनुसन्धान र नवप्रवर्तनलाई प्रवद्र्धन गर्दै आएको जनाइएको छ । 

यो साझेदारीले नीति निर्माण, शिक्षक दक्षता तथा बालमैत्री शैक्षिक वातावरण निर्माणमा सकारात्मक प्रभाव पार्ने अपेक्षा गरिएको दाबी गरिएको छ ।